ஈரோடு:
பெட்ரோல், டீசல் விலையை 3 மாதத்துக்கு ஒரு முறை நிர்ணயம் செய்ய வேண்டும், மூன்றாம் நபர் காப்பீடு உயர்வுக்கு கண்டனம் தெரிவிப்பது, சுங்க சாவடிகள் அகற்ற வேண்டும்,தமிழக அரசு டீசல் மீதான வாட் வரியை குறைக்க வேண்டும் உள்பட பல்வேறு கோரிக்கைகளை வலியுறுத்தி அனைத்து இந்திய மோட்டார் டிரான்ஸ் போர்ட் காங்கிரஸ், தமிழ்நாடு லாரி உரிமையாளர்கள் சம்மேளனம் சார்பில் நாடு தழுவிய லாரிகள் வேலை நிறுத்தம் இன்று முதல் நடைபெறும் என்று அறிவிக்கப்பட்டிருந்தது.
அதன்படி இன்று முதல் நாடு முழுவதும் லாரிகள் வேலை நிறுத்த போராட்டம் தொடங்கியது. இந்த போராட்டத்துக்கு ஈரோடு லாரி உரிமையாளர்கள் சங்கமும ஆதரவு தெரிவித்து இருந்தது.
அதன்படி ஈரோடு மாவட்டம் முழுவதும் இன்று 5 ஆயிரம் லாரிகள் ஓடவில்லை. சித்தோடு அருகே உள்ள நரிப்பள்ளம் ஓடையில் நூற்றுக்கும் மேற்பட்ட லாரிகள் வரிசையாக நிறுத்தி வைக்கப்பட்டுள்ளன.
லாரிகளில் வேலை நிறுத்த போராட்டம் குறித்த நோட்டீஸ் ஒட்டப்பட்டுள்ளது. லாரி டிரைவர்களும், கிளீனர்களும் அங்கேயே சமைத்து சாப்பிட்டனர். மேலும் பல்லாங்குழி, தாயம் விளையாடி தங்கள் பொழுதை கழித்து வருகிறார்கள்.
லாரி ஸ்டிரைக்கால் ஜவுளி பொருட்கள், மஞ்சள், எண்ணெய் வித்துகள், காய்கறிகளை வெளி மாநிலங்களுக்கு ஏற்றி செல்லும் லாரிகள் நிறுத்தி வைக்கப்பட்டுள்ளது. இதனால் சுமார் ரூ. 50 கோடி மதிப்பிலான பொருட்கள் தேக்கம் அடைந்து குடோன்களில் வைக்கப்பட்டுள்ளது.
இது குறித்து ஈரோடு லாரி உரிமையாளர்கள் சங்க செயலாளர் துரைசாமி கூறியதாவது.-
எங்கள் நியாயமான கோரிக்கைகளை வலியுறுத்தி இன்று முதல் அகில இந்திய அளவில் வேலை நிறுத்த போராட்டத்தில் ஈடுப்பட்டு வருகிறோம்.ஈரோட்டில் 5 ஆயிரம் லாரிகள் ஓடவில்லை. கடந்த 2 நாட்களுக்கு முன்பே வெளிமாநிலங்களுக்கு செல்லக்கூடிய சரக்குகளின் புக்கிங் நிறுத்தப்பட்டு விட்டது.
இது எங்கள் வாழ்வாதார பிரச்சனை ஆகும். எனவே மத்திய அரசு இனியும் தாமதிக்காமல் எங்களுடன் பேச்சுவார்த்தை நடத்த முன்வர வேண்டும். ஏற்கனவே வெளி மாநிலங்களுக்கு சென்ற லாரிகள் அங்கே பாதுகாப்பாக நிறுத்த அறிவுத்தப்பட்டுள்ளது.
எனினும் பால், மருந்துகளை போன்ற அத்தியாவசிய பொருட்களை கொண்டு செல்லும் லாரிகளுக்கு மட்டும் இந்த ஸ்டிரைக்கில் இருந்து விதிவிலக்கு அளிக்கப்பட்டுள்ளது.
இவ்வாறு அவர் கூறினார். #LorryStrike
